CHIZA AWAAGIZA WAKUU WA MIKOA KUWACHUKULIA HATUA WATAKAOPANDISHA BEI YA UNGA

WAZIRI wa Chakula na Ushirika, Christopher Chiza amewagiza wakuu wa mikoa kutumia madaraka waliyonayo kwa kuwachukulia hatua za kisheria  mawakala watakaouza unga kinyume na  bei elekezi ya sh 750 hadi 900 kwa kila kilo.

Chiza alisema hao wakati alipokuwa akizungumza na wandishi wa habari jijini Dar es Salaam kuhusu hali ya upatikanaji wa chakula nchini.

 

Alisema serikali imeidhinisha kuuzwa tani 40,000 za mahindi kwa mawakala, kutoka katika ghara la chakula la taifa kwa ajili ya maeneo yenye upungufu wa chakula, kwa bei ya sh 450 kwa kila kilo ambapo zoezi hilo limekwisha anza Januari na litaendelea hadi Machi mwaka huu.

 

“Lazima wakuu wa mikoa, wa wilaya, wenyeviti wa mitaa kwa kushirikiana na wanannchi wenyewe mshirikiane kwa pamoja katika suala zima la kudhibiti bei ya unga”alisema.

 

Chiza alisema mikoa itapaswa kuwachukulia hatua mawakala (sagishaji), ambao watabainika kuuza unga huo kinyume na bei elekezi ya serikali.

 

“Mikoa itachukuwa hatua kwa msagishaji ambaye atabainika kutumia vibaya kibali alichopewa kama vile kuuza kibali hicho kwa msagishaji mwingine, kusafirisha na kuuza mahindi au unga kwenye maeneo tofauti aliyopangiwa, kutosagisha na kuuza unga ndani ya siku saba kwa mujibu wa mkataba” alisema.

 

Chiza aliitaja baadhi mikoa yenye uhaba unga wa mahindi pamoja na tani walizopatiwa kuwa ni Arusha (tani 1100), Dodoma (400), Kilimanjaro (400), Lindi (400), Mara (900), Manyara (800).

 

Mingine ni Morogoro (400), Mwanza (2500), Shinyanga (1029), Singinda (500), Tabora (1000), Tanga (700),Mtwara (600), Pwani (700) Simiyu (1971) na Dar es Salaam (6400).