NCCR WASIKITISHWA NA KUFUTWA KWA MATANGAZO YA MOJA KWA MOJA KUTOKA BUNGENI

Faustine Sungura

Chama cha  NCCR-MAGEUZI  Kimetangaza kusikitishwa na  kitendo cha taarifa ya katibu wa Bunge kwa waandishi wa habari juu ya mpango wa kuzuia kurusha matangazo ya bunge moja kwa moja na badala yake kuyafanyia kwanza uhariri kabla ya kuwafikia walaji.

Hayo yamesemwa  na Kaimu katibu mkuu wa chama hicho Bw, Faustine Sungura wakiti alipokuwa akizungumza na waandishi wa habari katika makao makuu ya Chama hicho yaliyopo jijini Dar es Salaam.

Sungura amesema kuwa, wanapinga kwa nguvu zote hatua zozote zinazotaka kuchukuliwa na mamlaka yoyote ya kuzuia matngazo ya moja kwa moja  kutoka Bungeni.

“Tunapinga hatua hizi kwasababu, hoja na au sababu za kutekeleza azma hiyo kama zilivyotolewa na katibu wa Bunge ni hoja Dhaifu na Hasi”, amesema Sungura.

Ameendelea kusema kuwa Vurugu zinazotokea Bungeni haziwezi kukomeshwa kwa kuzuia kurusha Matangazo moja kwa moja bali ni kwa kutumia Utaratibu na kanuni za Bunge.

Bw, Sungura pia amezungumzia, swala la Ujumbe wa Matusi kwa Spika wa Bunge na kusema kuwa, kama Anna Semamba Makinda, ni jukumu lake kuwasiliana na Mwanasheria wake kama atakuwa amedhurika na jambo lolote.