TUMIENI NAFASI HII KUSALIMISHA SILAHA HARAMU: RPC

Katika kile kinachoonekana kutilia mkazo agizo la Waziri wa Mambo ya Ndani Mh. Emanuel Nchimbi alilolitoa hivi karibuni la kuwataka watu wanaomiliki silaha isivyo halali kuzisalimisha, kwa upande wake Kamanda wa Polisi mkoa wa Arusha, Kamishna Msaidizi wa Polisi Liberatus Sabas alitoa msisitizo kwa watu wa aina hiyo waliopo mkoa wa Arusha kwamba, ni nafasi yao sasa kujitokeza na kusalimisha silaha hizo bila kuchukuliwa hatua kwani wamepewa muda wa mwezi mmoja.

Kamanda Sabas aliyasema hayo jana ofisini kwake wakati akizungumza na waaandishi wa habari, na kufafanua kwamba,nafasi hiyo ya usalimishaji wa silaha hizo imeanza toka tarehe 4 mwezi huu na milango itafungwa rasmi tarehe kama hiyo mwezi ujao mwakani.

Aliwataka watu hao waliopo ndani ya mkoa huu wajitokeze na kusalimisha silaha hizo kwani hawatachukuliwa hatua ndani ya siku hizo ila baada ya tarehe hiyo kupita, Jeshi la Polisi mkoa wa Arusha litafanya msako mkali na yeyote atakayekamatwa atakuwa ni mhalifu kama wahalifu wengine wa aina hiyo.

Akitoa onyo katika kipindi cha kuelekea mwisho wa mwaka , Kamanda Sabas alisema kwamba mara nyingi uwa kunakuwa na makundi ya watu wanaojiingiza katika kufanya matukio ya uhalifu kwa madai ya kujiongezea kipato, hivyo amewataka watu hao kuacha mara moja tabia hiyo kwani jeshi la polisi mkoa wa Arusha limejipanga vyema kukabiliana nao.

Kwa upande wa Usalama barabarani aliwataka watumiaji wa vyombo vya usafiri na watembea kwa miguu kuwa makini katika matumizi ya barabara na kutakiwa kuzingatia sheria za usalama barabarani. Alisema wananchi waondoe dhana ambazo si sahihi  kwamba, mwisho wa mwaka lazima zitokee ajali nyingi bali hayo yanasababishwa na madereva na watembea kwa miguu kutozingatia sheria za usalama barabarani.

Mwisho Kamanda Sabas, aliwaomba wananchi wa mkoa wa Arusha waendelee kushirikiana na jeshi la polisi katika kutoa taarifa za uhalifu na wahalifu kwani bila hivyo suala la kutokomeza uhalifu litakuwa ni ndoto.