TCRA YAWATOA HOFU WANANCHI WASIOFIKWA NA MFUMO WA DIGITALI

MAMLAKA ya Mawasiliano nchini (TCRA), imewatoa hofu wananchi wote wanaoishi katika maeneo ambayo mfumo mpya wa mawasiliano Digitali haujafika kuwa wataendelea kupata mawasiliano kupitia mfumo wao wa zamani Analojia.

 

Kauli hiyo ilitolewa jijini Dar es Salaam jana, na Meneja wa Mawasiliano wa Mamlaka hiyo, Inocent Mungi, kuhusu wasiwasi uliyojitokeza kwa wananchi haswa waliyoko mikoani.

 

Mungi alisema watazima mtambo wazamani kule ambako huduma ya hiyo mpya ya Digitali imefika, hata hivyo, kwenye maeneo ambayo hayajafikiwa na mtambo huo mpya, yataendelea kutumia Televisheni zao kupitia mfumo wazamani.

 

Alibainisha kuwa hadi sasa ni asilimia 24 sawa na mikoa 11 ya nchi ndiyo itafaidika na mawasiliano hayo ya Digitali, ambapo kule kusiko kuwa na mawasiliano hayo bado wataendelea kupata mawasiliano kwa kutumia Setelait, madishi na usambazaji wa nyaya hadi hapo mfumo mpya utakapo wafikia.

 

“Naomba niwatowe hofu wananchi kuwa siyo kweli kwamba  ifikapo Decemba 31, serikali itazima nchi nzima mtambo huo wa Analojia, hiyo haiwzekani na wala siyo rahisi kufikisha huduma ya Digitali kwa mara moja katika maeneo yote ya nchi”alisema Mungi.

 

Aidha, alitoa wito kwa wananchi kuwa wasikubali kudanyika na maneno ya mitaani kuwa Televisheni za kichogo mara ifikapo mwishoni mwa mwezi huu hazitatumika tena, hivyo wanalazimika kuzitupa, hiyo siyo kweli.