 |
| Hatimaye ile ahadi ya Waziri wa Uchukuzi, Dkt. Harrison Mwakyembe
kuhusiana na kuanzishwa kwa usafiri wa daladala za treni jijini Dar es
Salaam utakaoanza Oktoba mwaka huu, imeanza kutekelezwa jana asubuhi na
wananchi mbalimbali wakanufaika na huduma hiyo kwa usafiri kati ya
Ubungo Maziwa na Posta, Stesheni kwa reli ya TRL. Usafiri mwingine wa treni utapitia reli ya TAZARA kutoka Kurasini hadi Mwakanga. Treni hiyo iliyokuwa na mabehewa sita likiwemo moja lililotengwa maalumu kwa ajili ya wanafunzi, ilionekana kufurahiwa na wananchi waliokuwa wamepanda kutokana na utulivu uliokuwamo ndani yake huku ukisindikizwa na burudani za muziki na matangazo kutoka kwa wahudumu waliokuwemo ndani ya kila behewa huku ikipokewa kwa shangwe katika maeneo yote ilipopita kwa wananchi kuwapungia mikono abiria waliokuwa ndani. Ndani ya treni hizo pia kulikuwa na usalama wa kutosha kutokana na kuwapo askari wengi ndani ya treni na vituoni kuanzia. Akizungumza wakati wa kuzindua rasmi safari hizo leo, Waziri Mwakyembe aliwataka wananchi watakaokuwa wakitumia usafiri huo kuvumilia kasoro mbalimbali zitakazojitokeza katika siku za mwanzo na kuahidi kwamba serikali itaendelea kuboresha huduma hizo kila uchao. Dkt. Mwakyembe aliwataka wakazi wa Dar es Salaam, hasa kwenye maeneo yaliyo karibu na reli kutunza miundombinu ya usafiri huo, ikiwa ni pamoja na kukomesha tabia ya baadhi ya watu kugeuza maeneo ya njia za reli kuwa majalala ya kutupia uchafu. Akawataka viongozi wa serikali za mitaa ambako reli zinapita waongoze uangalifu ili usafiri huo uendelee vyema na kuwapunguzia adha ya usafiri na foleni wakazi. “Nawaombeni Watanzania tuunge mkono usafiri huu, kwanza mzuri, wa haraka na pia wa kistaarabu, mtu unaweza kufunga tai yako kuanzia mwanzo hadi mwisho wa safari na isitingishike, tuachane na maneno ya watu wasioutakia mema usafiri huu...” “...Inasikitisha kuona kuwa katika baadhi ya maeneo, reli zimegeuzwa kuwa dampo na kujaa uchafu... nawaomba tujitahidi kutunza maeneo haya ya miundombinu ya reli," alisema Dk Mwakyembe huku akishangiliwa na wananchi. Alisema usafiri huo utakaoendeshwa na Mamlaka ya Reli ya Tanzania na Zambia (TAZARA) na Shirika la Reli Tanzania (TRL), utakuwa ukianza saa 11.00 alfajiri hadi saa 2.00 usiku. Treni zitakuwa zikipumzika kuanzia saa 5.00 asubuhi hadi saa 9.00 alasiri na kupumzika katika siku za Jumapili na sikukuu. Nauli ni Sh 400 kwa mtu mzima kwa TRL na Sh 500 kwa ile ya Tazara wakati nauli kwa mwanafunzi ni Sh 100. Abiria David Makalinja aliiomba Serikali kuondoa dosari ya ratiba ya treni hiyo kwa siku ya jana ili kuwafanya watumiaji wa usafiri huo kwenda na muda. Alisema kama kutakuwa na ratiba rasmi ya kupita kwa treni hiyo katika vituo vyake, itawasaidia wafanyakazi kujua muda wa kufika kazini, tofauti na hali iliyojitokeza jana ambapo abiria walilazimika kuisubiri treni hiyo katika kituo cha Ubungo kwa zaidi ya saa 3 kuanzia saa 12.20 hadi saa 3.30. Hata hivyo, kwa mujibu wa Mkurugenzi wa TRL, Amani Kisamfu, tatizo hilo limesababishwa na hitilafu ndogo ndogo zilizojitokeza ikizingatiwa kuwa hiyo ndiyo safari ya kwanza yatreni hiyo huku akiahidi kuzitafutia ufumbuzi wa haraka na kuweka hali sawa. |
 |
| Hawa ni baadhi tu ya wakata tiketi |
