Hussein Semdoe, MWANCHI, Handeni --
MWALIMU wa Shule ya Msingi Magamba, wilayani Handeni,
amehukumiwa kutumikia kifungo cha miaka mitatu jela, baada ya
kupatikana na hatia ya kufanya mapenzi na kumpa mimba mwanafunzi.
Mwalimu
huyo, Daniel Lukindo (24), alikuwa anakabiliwa na mashtaka ya kumpa
mimba mwanafunzi Halima Rashidi wa kidato cha nne katika Shule ya
Sekondari ya Kwaluguru.
Akisoma mashitaka katika shauri hilo
namba 240 la mwaka huu, Mwendesha mashitaka, Mkaguzi Msaidizi wa Polisi
Elibaliki Polangyo, alieleza mahakama kuwa kati ya Novemba mwaka jana na
Februari mwaka huu katika Kijiji cha Magamba, mwalimu Lukindo alikuwa
akifanya mapenzi na mwanafunzi huyo na baadaye, kumpa ujauzito.
Katika
kesi hiyo iliyokuwa chini ya Hakimu Mkazi Mfawidhi wa Mahakama ya
Wilaya ya Handeni, Patrick Maligana, mshtakiwa alikiri kosa lake,
akikubaliana na maelezo yote yaliotolewa na mwendesha
mashitaka. Kufuatia hatua hiyo, Hakimu Maligana, alimtia hatiani na
kumhukumu kutumikia adhabu ya kutumikia kifungo cha miaka mitatu
jela. Akifafanua kuhusu adhabu hiyo, Maligana alisema mshtakiwa alitenda
kosa baya na hasa ikizingatiwa kwamba ni mwalimu anayepaswa kuwa mfano
mzuri katika jamii, kwa kuzuia na kukomesha wimbi la matukio ya
wanafunzi wa kike kupata mimba.
“Sheria inasema mwanaume yeyote
atakayempa mimba mwanafunzi atakuwa ametenda kosa na kama atapatikana
na hatia, atastahili kutumikia kifungo kisichopungua miaka mitatu jela
na kisichozidi miaka sita. Kosa hili halitakuwa na nafasi ya kulipa
faini,” alisema Maligana.
Alisisitiza kwamba adhabu hiyo alitoa
itakuwa fundisho kwa walimu na wanaume wengine wenye tabia ya kupenda
kufanya mapenzi na wanafunzi wa kike.
