SERIKALI ya Tanzania imeuambia rasmi Umoja wa Mataifa (UN) kamwe
haitaingia vitani na Malawi baada ya kuibuka mgogoro wa mpaka
unaohusisha nchi hizo mbili katika Ziwa Nyasa.
Badala
yake, itawasilisha madai yake katika Mahakama ya Kimataifa yenye
dhamana ya utatuzi wa mgogoro iliyo chini ya Umoja wa Mataifa ambayo
itakuwa mwamuzi wa mwisho wa uhalali wa mpaka huo.
Hayo
yalisemwa juzi na Waziri wa Mambo ya Nje na Ushirikiano wa Kimataifa,
Bernard Membe wakati akihutubia Mkutano Mkuu wa 67 wa Umoja wa Mataifa
(UN) unaoendelea jijini hapa, akimwakilisha Rais Jakaya Kikwete.
Alisema
Tanzania imekuwa mpatanishi mkuu wa migogoro duniani ukiwamo wa Burundi
uliokuwa ukisimamiwa na Baba wa Taifa, Mwalimu Julius Nyerere na kamwe
haitakuwa kielelezo kibaya cha kudai inachokiamini kwa kutumia nguvu,
“Ushiriki wa marais wetu wastaafu kuanzia Mwalimu Nyerere, Benjamin
Mkapa na Rais Kikwete kutatua migogoro mbalimbali, hivi sasa ni sababu
tosha ya kuifanya dunia iamini kuwa njia sahihi kwa Tanzania kutatua
mgogoro ni diplomasia,” alisisitiza Membe.
Kuhusu
migogoro inayoendelea duniani, Membe alisema kushindwa kuvumiliana kwa
wanaopingana katika nyanja tofauti kumekuwa sababu kuu ya migogoro hiyo
kukithiri na kuhatarisha usalama wa watu na mali sehemu husika.
Katika
mkutano huo, Membe aliuomba Umoja wa Mataifa kutafuta njia ya dharura
ya kutatua mgogoro unaoendelea Syria kati ya majeshi ya Serikali na
yanayompinga Rais Bashir al Asad kutokana na athari kubwa iliyojitokeza
katika Taifa hilo hadi sasa, “Mheshimiwa Rais wa Baraza hili, sisi sote
tunajua madhara ya migogoro na vita, hasa pale maazimio ya UN
yanapokiukwa, hali ya Syria ni moja kati ya mifano hiyo ni vema tukawa
makini kufikiria mapema njia za kutatua migogoro kabla ya madhara kama
hayo kujitokeza,” alisema Membe.
Katika
mkutano huo, Membe alisema Tanzania na nchi nyingine 12 za Jumuiya ya
Maendeleo Kusini mwa Afrika (SADC) zimekubaliana kuunda Jeshi la pamoja
na kukituma kikosi cha askari 4,000 na kulituma Jamhuri ya Kidemokrasia
ya Watu wa Kongo (DRC) kusaidia upatikanaji wa amani ya kudumu dhidi ya
waasi wa M23 wanaoipinga Serikali ya nchi hiyo.
---
Habari via HabariLeo
