Fikiri ni mwanafunzi katika shule ya sekondari Mabadiliko. Yuko kidato cha pili.
Shule
ya sekondari Mabadiliko imekuwa na uhaba wa walimu. Katika masomo tisa
anayosoma Fikiri ni masomo matatu tu yenye walimu, ambayo ni hisabati,
jiografia na kiswahili. Masomo haya pia yamepatiwa vitabu vya kutosha
kwa sababu rasilimali zote za shule hiyo zinaelekzwa kwenye masomo hayo
yenye walimu.
Mwalimu mkuu wa shule ya sekondari Mabadiliko
anategemea mwaka ujao wa fedha walimu watakubali kuja kufundisha shuleni
hapo kwa kuwa tarafa yao kwa mara ya kwanza itapata nishati ya umeme.
Vilevile tayari kijiji kimeshapatiwa kisima cha maji. Ukosefu wa maji na
umeme uliwafanya walimu kukataa kabisa kupangiwa kazi katika shule ya
Mabadiliko.
Fikiri amekuwa akirudia kidato cha pili kwa miaka
miwili sasa. Ameshindwa kupata alama za wastani wa kumuwezesha kuingia
kidato cha tatu. Wanafunzi wengine wamefanikiwa kupata alama hizo na
wanaendelea katika vidato vya juu.
Wazee wa kijiji wanafahamu
kuwa Fikiri hatilii maanani masomo yake. hivyo waliamua kumuweka chini
na kumhoji. Alipoulizwa sababu za kushindw kupata wastani wa kuendelea
kidato cha tatu, Fikiri alisema kuwa swali hilo linamtia hasira. Amesema
hali ya shule yao kukosa walimu kila mtu anaifahamu na kwanini
washangae yeye kukosa wastani wa kufaulu. Katika mitihani yake Fikiri
hupata F za masomo nane na D ya somo la Kiingereza.
Tangu
kipindi hicho Fikiri amejenga chuki na wazee wa kijiji cha Mabadiliko na
amekuwa akilaani kitendo chao cha kumuona yeye mzembe wakati wanajua
hali ya uhaba wa walimu ilivyo. Fikiri amejitoa katika kushiriki
shughuli za maendeleo kijijini na marafiki zake wengi amegombana nao.
Somo:
Pamoja na shule ya mabadiliko kukosa walimu wa masomo mengine, lakini
uwepo wa walimu wa Hisabati, jiografia na kiswahili ulipaswa kutumiwa
ipasavyo na Fikiri katika kujiendeleza kimasomo na kupata wastani wa
kuendelea vidato vya juu.
Fikiri alitoa kipaumbele zaidi kwenye
kulalamikia udhaifu uliopo ambao kwa kiasi kikubwa uko nje ya uwezo wake
kuutatua badala ya kuzingatia zaidi nafasi yake katika kutekeleza
wajibu wake.
Je, walimu wa masomo mengine wakiripoti Fikiri
atabadilisha tabia yake na kuanza kufanya bidii? au tabia hiyo itakuwa
ndio mfumo wake wa maisha na atakachofanya ni kutafuta sababu nyingine
ya kulalamika
