WAZEE WA MTWARA WAUZA MBUZI KWA AJILI YA NAULI YA KUJA DAR ES SALAAM KUITETEA GESI YAO,, WAAPA LAZIMA GESI IWANUFAISHE LA SIVYO MAANDAMANO YATAENDELEA

Wazee kumi kutoka Mkoani Mtwara wakiwa wanaingia kwenye ukimbi wa Mikutano wa Maelezo jijini Dar es Salaam leo wakiwawakilisha wanamtwara kwa ajili ya kuja kutoa Tamko lao kuhusiana na Gesi iliyoundulika Mkoani kwao. Miongoni mwa wazee hao wamesema kuwa wamelazimika kuuza Mifugo yao ili kupata nauli ya kuja Dar es Salaam.

 

Wazee wa  Mtwara Mikindani leo wameongea na waandishi wa habari kataika ukumbi wa habari Maelezo kuelezea matakwa yao kwa Serikali juu ya Swala zima la Gesi ambayo inapatikana katika Mkoa wao.

Akizungumza kwa niaba ya wazee wenzake  Mzee Selemani Mademu amesema kuwa wanaitaka Serikali kuhakikisha kuwa Gesi inawafaidisha wao kwanza kabla ya kwenda kuwafaidisha wengine.

Amesema kuwa  wao wametumia Gharama zao wenyewe ikiwa ni pamoja na kuuza Mbuzi wao ili wapate nauli ya kuja kuitetea Gesi yao kwa manufaa ya wanamtwara wote kwa Ujumla.

Ameendelea kusema kuwa, wanaitaka serikali ihakikishe kuwa kituo cha kusafishia Gesi kinajengwa mkoani Mtwara kwani kuna bandari yenye kina kirefu kwa ajili ya Kazi hiyo na amesema kuwa wanaitaka serikali  katika kutekeleza    swala hilo ifanye vitendo kwanza na sio ahadi kama ilivyozoeleka.

“Tumechoshwa na ahadi za Serikali na kwa hili hatuhitaji tena ahadi tunataka vitendo la sivyo Gesi haitoki Mtwara tutazidi kuandamana, tuna rekodi ya ahadi tuloyo ahidiwa na Serikali na hazijatekelezwa mpaka leo kama vile: Barabara, Umeme, kuimarishwa kwa Bandari,  Mikopo  kwa ajaili ya Ujasiriamali, viwanda vidogo kwa ajili ya Kubangua korosho  n.k kwa hivyo sisi tunataka vitendo tu, tushachoshwa na ahadi”, amesema Mademu.

Serikali pia imetakiwa, kutimiza ahadi ya kujenga viwanda kama vya Mbolea na Saruji kama ilivyo ahidi kwa wanaMtwara jambo ambalo litawapa Matumaini  yasiyokuwa na Shaka kuhusu kupata Ajira, pamoja na kuratibu mchakato mzima wa Matumizi ya Gesi kwa kuwashirikisha mikoa ya kusini kwa hatua Zote na kwa uwazi.

Aidha wameitaka Serikali kujenga kituo cha kufua Umeme Power Plant Mtwara.

Wazee hao pia wamekanusha taarifa za Mwenyekiti wa NCCR-MAGEUZI  Mhe, James Mbatia za kuwa alishushwa Jukwaani tarehe 13/01/2013 na kusema kuwa jambo hilo halina ukweli wowote.

Hawa ndio wazee kumi kutoka Mtwara wakiwa ndani ya Ukumbi wa Mikutano wa Habari maelezo jijini Dar es Salaam

Mzee Selemani Mademu akisoma Tamko kwa niaba ya wenzake